اربع مناسبات مهمة للزوجة وكيف تحتفل بهم مع زوجها ❤️ افكار لليلة رومانسية
افكار لليلة رومانسية مع زوجك في المناسبات الخاصة
 |
| ازاي تحتفلي بالمناسبات الخاصة مع جوزك |
دايما الزوجة بتحاول تبتكر وتبحث عن طرق جديدة لإسعاد الزوج وقضاء ليلة رومانسية لأن في الطبيعي والسائد خاصة في البلدان العربية ان العلاقة الزوجية يشوبها الملل من وقت للتاني مع ظروف الحياة وقلة الفلوس والضغط الاجتماعي، وطبعا الزوج لو حس بالملل بيتزوج من ثانية، اما الزوجة فليس لها إلا أنها تعالج الشرخ اللي حصل في العلاقة عشان تقدر تتعايش وتكمل، ومما لا مفر منه أن المجتمع بيحمل مسؤلية الملل في العلاقة للزوجة للزوجة نتيجة انها مهملة في نفسها وناسيه واجبات الزوج وما إلى ذلك من اتهامات فبيكون من امثل الحلول انك تستغلي المناسبات الخاصة جدا في قضاء ليلة رومانسية مع جوزك وكسر الملل في العلاقة الزوجية.
في المقال دا هقولك ايه هي الليالي المقدسة بالنسبة للزوج والزوجة وازاي تعملي فيها يوم مختلف.
من المناسبات المهمة عند الزوجين
1- عيد زواجكم:-
تاريخ زفافكم هو من الايام اللي ممكن تعدي زي اي يوم عادي وممكن يكون يوم مقدس حسب ماتعودي جوزك من بداية زواجكم، لو عودتيه انه بيكون يوم مش عادي ممكن سنة والتانيه ينسى التاريخ بس بعد كدا هينتظره اكتر منك وهيحاول يتوقع انتي ازاي هتجهزيله، حاولي تعوديه من اول تاريخ زواج ان اليوم دا ذكرى مهمة لينا ولازم يكون يوم مش عادي.
ازاي تجهزيله وازاي تحتفلوا بيه:-
طبعا جميل جدا أن اليوم دا يكون مفاجأة لكن بصراحة انا مش بفضل الفكرة دي لأن احيانا كتير بيكون الزوج ناسي او ظروف شغله صعبة يضطر يرجع من شغله متأخر او يقضيه في الشغل وميرجعش اصلا بيضيع عليكي كل الترتيبات اللي عملتيها وتضيع عليكي فرحتك وتزعلي، أو ربما يكون عنده ضغط شغل فيكلمك بطريقه تضايقك وهو في شغله وميكونش واخد باله ان اليوم دا مناسبه خاصة فإنتي تزعلي فبلاش.. من الأفضل تعرفيه من قبلها بيوم ان بكرا عيد جوازنا وحاول ترتب امورك من النهارده ان بكرا ترجع بدري عشان نحتفل بيه مع بعض❤️، وطبعا مع شوية كلام حلو وحبة تشويق وسسبنس 😀
تجهزيله ازاي بقى؟
اولاً لازم يكون عندك في غرفة نومك إضاءة للمناسبات الخاصة بمعنى ايه إضاءة ملونه حمرا إنشالا لو لمبة سهارى اللي بتطلع إضاءة حمرا دي لو امكانياتك ضعيفة خالص، بس متشغليهاش عمال على بطال هي في المناسبات الخاصة بس عشان يحس بإختلاف وتطفي كل الانوار متشغليش الا هي بس.
ثانياً تطلعي بقى مفرش ليلة الدخلة او اي مفرش من المفارش الحلوة دي لو عندك مفرش جديد بكيسه يكون احسن كمان هتبقي المفاجأة أكبر، بس خدي بالك تسبيلك كام مفرش كدا للمناسبات الخاصة عشان يوم ما تفرشيهم تحسوا بتجديد.
ثالثاً جهزي العشا اليوم دا في طقم الصيني معلش انا عارفه انها حاجه صعبه بس تعالي على نفسك، وصبي العصير في كاسين وحطيهم في صينية حلوة وطبعا تكوني منضفة الشقة قبلها تنضيفه حلوة اوي كأنها ليلة عيد وياريت لو تسيبي الولاد مع جدتهم في اليوم دا او تنيميهم بدري لاء سربيهم احسن، ولو عندك فاكهة اغسلها كويس وجففيها من المايه وتحطيها في طبق شيك على السفرة او في التلاجة تكون جاهزة على الاكل🌷
رابعاً تجيبي حوالي 10 بلونات ألوان وكتري من الأحمر والأبيض وياريت اللي مكتوب عليها بحبك او حبيبي وتنفخيهم وتوزعيهم على السرير وعلى الأرض وتحطي وسطهم على السرير صورة جوازكم، وتشغلي اغنية رومانسية على موبايل او لاب او كاسيت المهم تخليها تكرر نفسها شغليها قبل رجوعه مالشغل بحاجات بسيطة و رشي معطر جو او لو عندك فواحة شغليها.
خامساً بقى جهزي نفسك ألبسي طقم نوم يكون ناسيه من زمان ملبستيهوش ولو عندك واحد جديد يكون احسن وظبطي نفسك وشكلك وشعرك وريحتك ولو عندك تاتو حطي ومكياجك ولو تلبسي خلخال يكون كويس، ابتكري بقى، وضلمي الشقة كلها ونوري الإضاءة اللي اتفقنا عليها ورشي معطر في البيت كله بقى.
وليلة سعيدة ان شاء الله 😊😍
2- عيد ميلاده وعيد ميلادك:-
كل اللي عملناه فوق هنعمله تاني مع اختلاف بسيط ان صورة جوازك هتحطي مكانها وسط البالونات تورته وفيها شمع وتطفي كل الانوار وتنوري الشمع 💕
3- ليلة العيد:-
دي من الليالي الاسرية ومن المناسبات العائلية المهمة اللي مهم ان أولادكم يقضوها معاكم، وعشان كدا طقوسها هتكون مختلفة شويه
أولاً اعملي حسابك الشقة تكون نضيفة وجاهزة من يوم الوقفة على الظهر بحد أقصى، وبتجهزي لأكله حلوة للغدا
ثانياً اليوم دا تجهزيله تسالي كيس شيبسي مثلا كيكة حلوة زيك كدا، لب وسوداني عشان فلم السهرة، وبعد الغدا دش حلو للبيت كله وللاولاد وتلبسيهم هدوم نضيفة وتلبسي بيجامتك الجديدة وياريت لو تكون ستان وعطري الجو وريحتك تكون حلوة.
ثالثاً نتفرج في جو عائلي جميل على فلم السهرة مع بعض والساعة 11 ولا حاجه ننيم الاولاد.
رابعاً اوضتك تكون جاهزه لسهرة شخصية معاكي تليفزيونك في اوضة النوم، تلبسي طقم نوم حلو زيك وتجهزي نفسك وتعطري هدومك، وتحتفلوا بعيد جديد على حياتكم وربنا يجعل كل أيامكم أعياد 💕🌼
ومتنسوش تقدروا مجهودنا باشتراكك في المدونة عشان يوصلك كل الموضوعات اللي هتنزلها المدونة بعد كدا، ومتقلقيش الاشتراك مجاني 😉
تعليقات
إرسال تعليق