تعرفي ازاي انك لازم تنهي الخطوبة (صفات لو لقيتيها في خطيبك اهربي) (1)

فترة الخطوبة

كتبت/ رحاب بدر

فترة الخطوبة

هي من اكتر الفترات الجميلة في حياة كل بنت، وفترة الخطوبة دي اتعملت عشان الطرفين يفهموا بعض ويكتشفوا صفات بعض ويقرروا هيكملوا ولا لاء عن اقتناع في كلا القرارين.

حاجات مهم تعرفيها عن الخطوبة

1- لازم تكوني علي قناعة تامة ان الفترة دي من احلي فترات حياة اي بنت وعشان كدا لو كانت معاكي غير كدا اعرفي ان في حاجة غلط لازم تكتشفيها دلوقتي لانك لو اكتشفتيها بعد الجواز حياتك كلها هتدمر.

2- لازم تعرفي ان كلهم بيتجملوا في فترة الخطوبة وعشان كدا اكتشاف حقايق الاشخاص في فترة الخطوبة مش حاجة سهله محتاجة وقت كتير ومواقف كتير، ودا هيحتاج منك تخلي فترة الخطوبة طويلة اوي علي اد ماتقدري ومتخافيش ان طول الفترة هينهي الخطوبة صدقيني يابنتي دا نصيب ولو مكتوبلكم تكملوا هتكملوا ولو مش مكتوبلكم تكملوا هتنفصلوا حتي لو الخطوبة شهر واحد.

3- لازم تعرفي ان كل الناس مختلفين حتي لو اتنين اخوات يعني طبيعي هتلاقي بينكم اختلافات بس المهم انك تعرفيه في الخطوبة ان الاختلافات اللي بينكم دي مش هتأثر علي مسار حياتكم وانتوا الاتنين متقبلينها ومتعايشين معاها تماماً.

4- لازم تعرفي ان علاقتك بأهله مهمه ويمكن اهم من علاقته هو بأهلك مهم تعرفيهم وتتأكدي ان بيتك شبه بيته واهله شبه اهلك وبيئتكم مش مختلفه كتير عشان دا هيسهل عليكي حياتك معاه لان انتي اللي هتنتقلي عليتهم وهتبقي فرد جديد منهم وهتشيلي اسمهم لكن جوزك انتمائه واختلاطه بأهلك اختياري حضرتك غير وضعك معاهم خالص 😑

5- اخر واهم حاجة تعرفيها بقي قبل خطوة الخطوبة انها مش وصمة عار ولا هتتعد عليكي زي مابعض المتخلفين بيقولولك لما تتخطبي وميحصلش نصيب اكتر من مرة اوعي اوعي تكملي مع حد مش مناسب عشان دي تاني ولا تالت ولا حتي رابع خطوبة ليكي، النهارده البنات بتصاحب 10 وبترتبط ب 20 قبل الخطوبة الفرق بينك وبينهم انهم عملوا حاجة في السر لكن انتي عملتيها في النور متخليهاش تكون نقط ضعف ليكي بالعكس دي نقطة قوة💪 انتي انسانة محترمة ومرغوب فيكي بس مفيش نصيب مع التلاته ولا الاربعة ولا حتي العشرة اللي فاتوا لسه النصيب مجاش ولما تبقي مفسوخه احسن ماتبقي مطلقة 😁

صفات تجنبيها في شريك الحياة

تعرفي ازاي بقي ان البني آدم دا تكملي معاه ولا لاء؟ 

اربع حاجات اهتمي تعرفيهم فيه ولا لاء في فترة الخطوبة هقولك هما ايه وتعرفيهم ازاي. 

1- الكذب 

اوعي واياكي وبكل اساليب التحذير اللي بكل لغات العالم بحذرك انك ترتبطي بيه، الكذب دا مش بيجي نتيجة دافع او اضطرار دا مرض، الشخص الكذاب دا بيكون مريض وعنده ضعف في شخصيته من طفولته انه يواجه مشاكله فبيأجلها بالكذب فبيتحول عنده الكذب من وسيلة إلي مرض زي ما قال ربنا في كتابه ويظل الرجل يكذب حتي يكتب عند الله كذاباً، بس مشاكله مش بتتحل بالكذب بالعكس دي بتتكاثر لان كل مشكلة مع مرور الوقت بتكبر وبيكون ليها توابع مع الكذب والتأجيل فالانسان دا انتي مش هتلاحقي علي مشاكلك معاه علي مر حياتك، لانه من انعكاس عدم ثقته في نفسه هو كمان معندهوش ثقة في اللي حواليه وانتي منهم مهما قالك بلسانه انا بثق فيكي و.. و... و.. بيكذب 🙂 ودا طبعاً مش جديد عليه هو فعلا معندهوش ثقة فيكي مش عشان انتي لا تستحقي الثقة لا عشان هو مريض بالفعل،....... 

تعرفيه ازاي بقي.... 

طبعاً صعب جدا تعرفي انه بيكذب لسبب بسيط جدا ان دايماً كلام المخطوبين بيقتصر علي الكلام الرومانسي والسؤال عن الاحوال وممكن يحكيلك مشكلة عنده في الشغل او في البيت انتي طبيعي هتصدقي كل اللي هيقولهولك حتي لو بيحكي احداث مختلفة تماماََ عن الواقع لانك ببساطه بتسمعي من طرف واحد... لو فترة الخطوبة قصيرة صعب جدا تكتشفي صفة الكذب في الشخص لكن لو طويلة اعتقد هتكتشفي بنسبة كبيرة، ولو حصل مواقف كذب منه بس صغيرة اعرفي انه كذاب لان اللي بيكذب في الصغيرة بيكذب في الكبيرة، من وقت لوقت افتحي موضوع هو كان كلمك عنه قبل كده وفيه احداث كتير واسأليه لو لقيتي ردوده اتغيرت او بيتلجلج في كلامه اعرفي انه بيكذب لان متمرس الكدب من كتر مابيكدب بينسي هو قال ايه وكل مره بيقول كلام مختلف.

خلي علاقتك بأهله كويسه ولو حكالك عن مشكلة مع اهله حاولي تعرفي تفاصيلها من اهله بس بذكاء يعني مثلا فلان مضايق حاسه ان في مشكلة واعرفي تفاصيلها منهم وشوفي في اختلاف في الكلام ولا لاء. 

حاولي تعملي صداقات مع اصدقاءه البنات مثلا ولو في بينكم اصدقاء ولاد مشتركين اسأليهم عن تفاصيل عنه اكيد هتعرفي منها حاجة. 

توابع الكذب (ملحقات الكذاب) صفات ملازمة الكذب 

كل كداب بيكون عنده مشكلة نفسيه، وليها توابع علي شخصيته مفيش حد كذاب وبس كدا لاء الكذب بيجذب صفات تانيه صعب التعايش معاها زي 

الكذاب دايما عنده احساس الاضطهاض دايماً شايف نفسه مظلوم وغير محبوب والناس متجنباه حتي مع اهله، دايما بيتهمك بحاجات انتي معملتيهاش ولا عملتي ما يدل عنها لكنها ناتجه عن احساسه هو وعدم ثقته بنفسه، دايما حاسس ان كل الناس عاوزه تستغله، وكل الناس بتكرهه، وكل الناس بتحسده، وكل الناس بتظلمه وكل الناس مش فاهمينه وبيتجنبوه وبتوع مصلحتهم... والحقيقة ان كل دي انعاكاسات شعوره هو تجاه الاخرين يعني هو اللي حاسس كدا تجاه الناس فمتوقع انهم بيبادلوه نفس المشاعر 🙂

الكذاب شخص يعشق التشكيك دايماً هيشكك في صحة كلامك وسلامة عقلك عشان تقتنعي ان انتي اللي بتنسي مش هو اللي بيكذب 

الكذاب شخص غير مسؤول هو اضعف وأجبن من انه يشيل مسؤوليه بيت هتلاقيه بيتهرب منها بطرق كتير اولهم الكذب، زي ماتهرب من مواجهة مشاكله بالكذب فتأكدي انك هتشيلي الليله لوحدك، لانه مش هيحل اي حاجه انتي اللي هتحلي كل مشاكله قبل مشاكلك. 

الكذاب شخص مستنزف هتلاقيه دايما بيطلب حاجات من اللي حواليه، وزي ماقولنا انه احيانا كتير بيكون شخص انطوائي لايمانه الداخلي ان كل الناس مش بتحبه وبيتجنبوه فإعرف انه لما يكلمك او يتقرب منك هيكون عاوز مصلحة، هو بنسبة كبيرة كل اللي في حياته بيخدموه واللي بيبطلوا يخدموه بيخرجوا من دايرة حياته بالتدريج لكن هو مبيقطعش علاقته بحد دايما سايب الباب موارب. 

الكذاب دايماً بيكون خواف وجبان متنتظريش منه يدافع عنك في اي موقف او يتصدى لحد بيعاكسك مثلا إلا من رحم ربي اكيد لكل قاعدة شواذ. 

ازاي تفهميه في فترة الخطوبة

واخيراً ياستي صدقي احساسك انتي مش هتتأكدي انه كداب بنسبة 100٪ اكيد بس هتكوني حاسه، صدقي احساسك عادي يروح ويجي غيره بس اوعي تخاطري، ومتصدقيش اللي يقولك كلهم بيكدبوا، وخدي اللي يحبك لا خدي اللي يحترمك ويصونك ويكون امين عليكي وصادق ومسؤول حتي لو مش بيحبك هيحبك من حسن معاملتك له. 

عشان ميبقاش الموضوع كبير هتقرأي باقي الصفات في  المقال التاني من هنا👇
صفات لو لقيتيها في خطيبك اهربي (2)