١٠ حاجات ممكن تعملهم لابنك اهم من انك تدخلة مدرسة انترناشيونال

حاجات مهم تعملها لأبنك

كتب: اسلام رفاعي 

١٠ حاجات ممكن تعملهم لابنك اهم من انك تدخلة مدرسة ال ABC-XYZ الدولية المهلبية الي بعشروميت الف دولار  :- 

١ -البريتش كاونسل 

 وديه البريتيش كاونسل ٣ مرات في الاسبوع ، هيبقي بيتكلم انجليزي كويس احسن من ميس حسناء الي بتدرسله في المدرسة الدولية ، او مستر چون الي هو شغال سمكري سليسيون في بلجراد .

٢ - تعليم القرآن

علمه القرآن هاتله واحد يحفظه او يعلمه ازاي يقرا الكتاب الي هيدخلك انت شخصيا قبله الجنه . 

٣ - تعليم هواية 

خليه يتعلم هواية ، بيانو ، جيتار ، رسم ، نحت ، بريك دانس ، باركور اي حاجة لما يتضايق يفكر انه يعملها. 

٤ - اتعلم تقول لأ

 قوله " لأ " و صمم علي موقفك ، الموضوع ده مهم قوي ، 
مش كل حاجة هو عايزها لازم تتجاب ، مش كل حاجة انت مش عايز تجيبها لازم تشرح السبب ، مش كل اما يعيط لازم يصعب عليك , " ممكن يبقي بيستهبل " ، سيبه هيعيط شوية و بعدها هيبقي راجل .

٥ - متعليش صوتك 

علمه انه ميعليش صوته ، من غير ما انت تعلي صوتك ، في المانيا انا بركب القطر ١٠ ساعات جنبي اطفال جميع الاعمار عمرهم في التاريخ ما عيطوا ، و لا قريفوا ، و لا كانوا عايزين يرضعوا ، و لا زمزقوا ، و لا اتكرعوا ، العيب فينا احنا مش في الطفل . هو بيسلك نفس سلوكنا احنا. 

٦ -  متذلهوش بغلطاته 

متقفش ابنك و هو بيعمل حاجة غلط عشان تذله و تكسر عينه ، و تقعد تقوله كل شوية 
" خارج مع محمد برده - و لا خارج مع احمد صاحبك الشمام زي ما قفشتك و انت بتكدب عليا يا كلب يا واطي يا زبالة من ١٠ سنين " لا ما اضربوا الواد بالرصاص اسهل .

٧ - انت مش فاشل

 اوعي تقول لابنك انت فاشل . حتي لو هو فاشل. 
اوعي تقوله انت زبالة . حتي لو هو زبالة.  
اوعي تقوله انت مال ياض جسمك عامل كده ليه ، 
حتة لو هو فعلا جسمه عامل كده ليه بالذات لو صغير .

٨ - اعمل اللي عاوزه يعمله 

متقولوش ابدا اي حاجة ، " وريه " ، 
متقولوش متعليش صوتك " بصوت عالي " ، 
متقولوش متكدبش و انت كداب ، 
متقولوش صلي و انت مبتصليش ، 
متقولوش ذاكر و انت بقالك ٢٠ سنة مفاتحتش كتاب .

٩ - طمنه

 استغل اي مصيبة هو عملها ، عشان تقوله " متقلقش " انا فى ظهرك ، كسر كوباية ؟ " قوله يلا نشيلها بسرعة قبل ما ماما تشوفنا " او العكس ، حسسه ان مش كل الناس ضده .

١٠ - ادعيله 

و دي الاهم -  انك تصحي كل يوم الفجر ، و تدعي في كل صلاة لولادك و متياسش و تصر و تلح في الدعاء كل يوم ، كل يوم ، دي تكفي جدا ان شاء الله .