اعرف الحاجات اللي البنت بتتجوز عشانها

طبعاً كل بنت بتحلم باليوم اللي هتتجوز فيه وفي خيالها واحلامها بعض المواقف والأحلام اللي بتكون متخيلة انها هتعملها لما تتجوز وطبعاً مش محتاجين نقول ان الحاجات دي في الأفلام بس خلينا نقولهالكم يمكن تكونوا مش عارفينها ولما تعرفوها تعملوهالهم

الفرح

البنت بتبقى عاوزه تتجوز عشان تعيش الفرحة بتاعت يوم الفرح، والفستان والقاعة والفرحة والرقص والمكياج وبتبقي منتظرة ان اليوم دا يكون اسعد يوم في حياتها وتتخيل ان الناس هتعيش عمرها كله يحكوا ويتحاكوا بفرحها وفستانها ومكياجها وطبعاً ان اليوم دا يبوظ من الحاجات اللي بتكسر قلب البنت جداا لأنها عاشت سنين عمرها اللي فاتت كلها بتحلم وتخطط لليوم دا مش عشان في الاخر يبوظ وتنكسر فرحتها، فياريت نخلي بالنا كويس ان كل حاجه في اليوم دا تكون مظبوطه لانه يوم مهم اوي عندها.

اللعب

طبعاً كلنا بنشوف مشهد الضرب بالمخدات والكابلز لما بيلعبوا كوتشينه والكابلز لما بيلعبوا مع بعض ويجروا ورا بعض، المشاهد اللي بتكون مليانه ضحك ولعب وحب دي بالظبط ياعبحليم، ودي من الأسباب القوية اللي بتخليها عاوزه تتجوز عشان فاكرة ان المشاهد دي بتحصل بجد

الشيكولاته

البنت عاوزه تتجوز عشان تلاقي اللي يجبلها شيكولاته وعرايس ويحترم طفولتها، اه والله داحنا عيال اوي على فكرا.

الاحضان العفوية 

البنت بتحب الحضن لانه بيحسسها بالدفئ والأمان ودي من الحاجات اللي بتحسس البنت بالراحة مع شريك حياتها، لكن طبعاً الراجل له مفهوم مختلف عن الاحضان وبنسبة كبيرة بيعتبره مقدمات لما بعد الحضن ودا اللي بيحسس البنت بالخوف والاشمئزاز وبيمنعها من انها تعبر عن حاجتها او رغبتها في الاحتضان وبتتلاشى مع الوقت.

الهدوم الجديدة 

طبعاً البنت لما بتتجوز بيكون دولابها مليان هدوم كلها جديدة داخلية وخارجية وأشكال وألوان، وحاجات ممنوع تلبسها في بيت العائلة فكان السبيل الوحيد عشان تجرب احساس فرحتها بلبس كل اللي نفسها فيه وكله جديد في جديد انها تتجوز، فتلاقي البنت اللي بتحلم ببيت الزوجية جزء كبير من حلمها بتتخيل نفسها بكافة أشكال الهدوم المختلفة.

البيت المهندم 

البنت بتحب تهندم بيتها، ايوه زي ماقرتيها كدا بالظبط تهندمه يعني كل حاجه تحطها فيه علي ذوقها حتى ريحة المعطر اللي بترشه للشقه لازم يكون على ذوقها، وتحب دايما الشقة تكون نضيفة وهاديه ودا طبعاً صعب يحصل في بيت العيلة فكان الحل ان يبقى ليها مملكتها الخاصة بيها.

الخروجات 

البنت بتكون متخيله ان جوزها هيحررها من السجن اللي هي فيه وهيكون لذيذ بقى وبيحب الخروج والفسح والضحك مش زي بابا وماما اللي سنهم كبير فتفكيرهم وطريقة حياتهم مختلفة عنها والموضوع دا بيكون مضايقها جدا لدرجة انها بتتجوز عشان تتحرر من الأسر دا، فتتخيل ان جوزها هو اللي هيخرجها للدنيا على الاقل مره كل أسبوع دا لو مكنش كل يوم على أساس انه مورهوش غيرها بقى. 

مسك الايد في الشارع 

البنت بتحب اوي الولد يمسك ايدها في الشارع بيحسسها بالأمان دا غير انه بردو من المشاهد اللي ارتبطت بالحب والرومانسية في عقل البنت بسبب الأفلام. 

مشهد ان جوزها بيأكلها في بؤها 

والمشهد دا غالباً ما بيتحققش خالص واحمدي ربنا انها جت على اد انه مبيأكلكيش في بؤك وبياكل اكلك وبس، الحمدلله انه مكلكيش انتي اصلاً

المشي تحت المطر 

المشي تحت المطر مع الزوج او الحبيب من المشاهد اللي بتأسر البنات جدا لأنها ارتبطت في عقلها انها من المشاهد الرومانسية زي مابتشوفها في التليفزيون وبيكون عندها احساس بالشغف انها تجربه.

رش بعض بالمايه او بالدقيق في المطبخ

من المشاهد اللي مرتبطه بالكابلز في الأفلام الرومانسية سواء الهندي او الأجنبي واللي مرتبطة بشكل كبير في ذهن البنت بالجواز فتلاقيها عاوزه تتجوز عشان جوزها يساعدها في المطبخ ويرشوا بعض بالدقيق، أو يساعدها في غسيل السجاد مثلا ويرشوا بعض بالمايه.