7 حاجات لو عملتيهم هتخلي يوم الجمعة يوم مميز ليكي ولأسرتك

7 حاجات لو عملتيهم هتخلي يوم الجمعة مميز ليكي ولأسرتك

طبعا معروف ان يوم الجمعة هو يوم مبارك وعيد في الأرض وفي السماء، ولكن اللي بيحصل انه بيعدي زي اي يوم بل أسوأ عند أسر كتير، مدونة حاجات وكلام بنات هاقولك على روتين يخلي جمعتك مميزة.

يوم الجمعة

دعاء ليلة الجمعة 

1. التهيئة النفسية مهمة

لازم تعرفي ان التهيئة النفسية مهمة جداً لنجاح خطتك يعني انتي من الخميس بالليل لازم تكوني مهيأة نفسياً ان بكرا ان شاء الله هيكون يوم جميل ومميز، ودا طبعاً يستلزم انك تكوني نايمة سعيدة ومرتاحة عشان تبدأي يومك الجديد بتفاؤل وسعادة.

2. جهزي ليوم الجمعة من يوم الخميس

اكل الجمعة جهزيه يوم الخميس لو محشي لفيه ورصيه وخلي الحله في التلاجه على التسويه، والفراخ او اللحمه على التسوية بردو وقيسي على كدا كل الأكلات.

3. امسحى شقتك يوم الخميس

امسحى الشقة وغيري ملايات السراير وخلي البيت بايت نضيف كأنها ليلة عيد

4. اشتري فاكهة وتسالي

جهزي التسالي والفاكهة من يوم الخميس عشان تتفرجوا مع الأسرة على فلم جديد يوم الاجازة مع الاولاد في جو عائلي جميل

5. ليلة جمعة سعيدة مع الزوج

لازم تقضي ليلة الجمعة اللي هو الخميس بالليل مع جوزك انتي فهماني طبعاً، لأن زي ماقولنا التهيئة النفسية مهمة فانتوا لازم تكونوا نايمين مبسوطين وتصحوا مبسوطين.

6. سورة البقرة

شغلي سورة البقرة على راديو او موبايل وسيبيها شغالة طول الليل بصوت واطي عشان تنضف البيت من اي حاجه وحشه لا قدر الله 

7. الاستيقاظ المبكر

اصحوا بدري يوم الجمعة وقضوا اليوم من أوله تاخدوا التشاور الجميل، وتصلوا الصبح وتفطروا مع الاولاد، وتقرأوا سورة الكهف قبل صلاة الجمعة لازم تعودوا أولادكم على العادة الجميلة دي، و ولعيلك عودين بخور بريحة العود او العنبر وفتحي الشبابيك وخلي النور يدخل بيتك، والزوج ياخد الاولاد وينزل يصلي الجمعة في المسجد، وانتي شغلي النار على المحشي والفراخ يستوي وصلي الظهر، واغسلي الفاكهة وتحطيها في طبق الفاكهة ع السفرة مع التسالي واستني جوزك والأولاد لما يرجعوا عشان تتفرجوا مع بعض على فيلم جديد، وبعد الفيلم اتغدوا سوا، وسيبي بباهم يلعب معاهم نص ساعة تكوني غسلتي أطباق الغدا وخلصب واطلعي العبي معاهم هنخلي اليوم كله لعب وحب وضحك مع الاولاد عشان لما يكبروا يفتكروا الذكريات الجميلة دي ويبقى بالنسبالهم يوم مميز، وقبل المغرب بساعة اقعدوا مع بعض في البلكونة اتفرجوا علي الغروب واشربولكم كبايتين شاي واتكلموا مع بعض ف اي حاجة.

وربنا يحلي كل ايامكم يارب

متنسيش تدوسي علي كلمة اشتراك هتلاقيها فووق عشان يوصلك كل الموضوعات اللي هتنزلها المدونة بعد كدا